30-июнь, Бишкек - 28-июнда Кыргыз Республикасындагы БУУӨПтүн колдоосу менен JIA бизнес-ассоциациясы тарабынан ишке ашырылып жаткан Насаатчылык программасынын катышуучуларынын бүтүрүү аземи болуп өттү. Демилге Финляндия өкмөтү тарабынан каржыланган «Соодага көмөк көрсөтүү» долбоорунун бир бөлүгү болгон.
Программа кошумча нарк потенциалы жогору артыкчылыктуу секторлордо: табигый бал, кургатылган жемиштер жана жаңгактар, кийизден жана булгаарыдан жасалган кол өнөрчүлүк жана укмуштуу окуяларга бай туризм менен алектенген, өзгөчө айымдар менен жаштардын ишкердик көндүмдөрүн жана экспорттук потенциалын өнүктүрүүгө багытталган.
Ар тараптуу колдоонун аркасында программанын катышуучулары бизнести пландоо, маркетинг, электрондук коммерция, салык салуу жана команданы башкаруу боюнча өз компетенцияларын олуттуу түрдө бекемдей алышты. Алар жеке насаатчылыкка, тренингдик иш-чараларга, тармактык байланышка жана бизнесин ачуу же кеңейтүү үчүн гранттык колдоо алууга мүмкүнчүлүк алышты.
Программанын негизги натыйжалары:
- Катышуучулардын кирешеси орто эсеп менен 25% га өстү,
- 15 жаңы ишкана жана 56 жумушчу орун түзүлдү, анын 45и айымдар жана ден соолугунун мүмкүнчүлүгү чектелгендер үчүн;
- Бир компания экспорттук рынокко онлайн сатуу аркылуу кирди,
- 33 ишкер алган тиешелүү билиминин, бизнес жөндөмүнүн жана алган гранттарынын аркасында бизнесин кеңейтти,
- Бизнес-коомчулуктан жана жарандык коомдон 32 насаатчы окутулуп, активдүү насаатчы болуп калышты.
17 айдын ичинде Кыргызстандын ар кайсы аймактарынан келген 60 ишкер насаатчылардын үзгүлтүксүз колдоосун алышты: консультациялар, тренингдер, практикалык сунуштар. Программанын алкагында жалпысынан 50дөн ашык окуу иш-чаралары өткөрүлдү, алар ишкердик ишмердүүлүктүн негизги аспектилерин - финансылык пландаштыруудан конфликттерди башкарууга чейин камтыды.
"Насаатчылык жана окутуу аркылуу ишкердикти өнүктүрүү - бул Кыргызстандын туруктуу келечегине инвестиция. Биз аялдардын жана жаштардын потенциалына, ошондой эле жергиликтүү бизнестин күчүнө ишенебиз жана алардын өсүшү, экспорту жана коомчулуктун өнүгүүсүнө салым кошуусу үчүн шарттарды түзүүнү улантуудабыз", - деди ПРООНдун Кыргыз Республикасындагы Туруктуу Өкүлү Александра Соловьева.
Бул контекстте насаатчылык айыс ишкерлерге иш жүзүндө бизнес көндүмдөрүн бекемдөөгө жана туруктуу бизнес мамилелерин түзүүгө жардам берет.
"Насаатчылык программасы билим алмашуу жана өз ара колдоо көрсөтүү үчүн маанилүү аянтча болуп калды. Биз катышуучуларыбыз менен сыймыктанабыз жана алынган тажрыйба алардын бизнесин андан ары өнүктүрүү жана жергиликтүү коомчулуктун туруктуулугун жогорулатуу үчүн трамплин болуп калат деп ишенебиз", - деп кошумчалады Насаатчылык программасынын командасынын жетекчиси Нураим Манапбаева.
Ишкердикти, өзгөчө аялдардын жана жаштардын ишкердигин колдоо БУУӨПтүн Кыргыз Республикасындагы негизги приоритети бойдон калууда. Мындай демилгелер 2030-жылга чейин Улуттук өнүктүрүү программасын ишке ашыруунун алкагында туруктуу өнүгүү максаттарына жетишүүгө, аймактардын экономикалык потенциалын ачууга жана жаңы жумуш орундарын түзүүгө өбөлгө түзөт
